Iloilo City: Pag-isyu sang accountable forms sa non-accountatble officer agud magkolekta sang arkabala sang mga vendors sa Iloilo Terminal Market, madugay na nga practice

By: Aine Grace Bravo

Madugay na nga practice sa Iloilo Terminal Market ang pag-isyu sang accountable forms sa mga non-accountable officers sa pag-kolekta sang arkila kag bayad sa suga sang mga vendors sa merkado.

Suno kay Ms. Emmalene Diana, administrative officer 1 sang Local Economic Enterprice Office, casual employee pa lang siya sadtu apang ginapatuman ang amo nga sistema. Wala man suno sa iya sang may naghambal sa ila nga sala ang ila gina-obra kag untaton ang sistema. Ginpahayag pa ni Diana nga lima lang sila ka accountable officers ang gina-isyuhan sang accountable forms nga bonded sang City Treasurer’s Office.

Apang nagaguwa nga magluwas sa ila, may mga permanent kag casual employees kag job hires nga indi otorisado manukot sang arkabala ang gina-isyuhan sang accountable forms. Ini ang rason suno sa iya kon ngaa may korapsyon sa Iloilo Terminal Market.

Aminado si Diana nga kulang ang collectors sa merkado rason nga ginapabulig ang iban nga empleyado bisan indi bonded sang accountable forms.