Iloilo City: Committee report sa hearing may kaangtanan sa gin-alegar tuklu-anay sa Iloilo Terminal Market, posible ipaguwa sa masunod nga semana

By: Aine Grac Bravo

Posible ipaguwa sang Committee on Markets and Slaughterhouse sang City Council ang kaundan sang committee report may kaangtanan sa gin-alegar tuklu-anay sa Iloilo Terminal Market sa masunod nga semana.

Apang antes ipaguwa ang committee report, ginpahayag ni Kagawad Plaridel Nava, vice chairman sang komitiba, nga diskusyonan anay sa Lunes sang mga miembro sang komitiba ang final committee report. Suno kay Nava, katapusan na ang hearing sang komitiba kahapon.

Nagtambong sa hearing si Ms. Emmalene Diana nga administrative officer 1 sang Local Economic Enterprise Office kag pila ka personalidad nga ginmitlang sini sa supplemental affidavit nga ginpasa kay Kagawad Rodel Agado, chairman sang komitiba.