Iloilo City: Ungka Terminal, pasiraduhan ni Kag. Plaridel Nava kon wala gihapon sang improvement!

By: Aine Grace Bravo

Pasiraduhan ni Kagawad Plaridel Nava, chairman sang Committee on Transportation sang City Council, ang Ungka Terminal pananglitan wala gihapon sang makita nga improvement sa sulod sang duha ka tuig.

Suno kay Nava, ginpalawig sang syudad ang pag-operate sang Ungka Terminal nga ginapanag-iyahan ni Mr. Narciso Pueblo sa pagpati nga maka-introduce ini sang improvement. Sabat ini sang konsehal matapos ang nabaton nga mga reklamo halin sa mga drivers kag pasahero nga nagalaputyak ang palibot sang terminal kun mag-ulan kag tuman naman ka yab-ok kun tag-ilinit. Magluwas sini, indi man maagwantahan ang mabaho nga kanal kag nagasaramihay nga kasilyas.

Ginpasalig ni Nava nga sa sulod sang duha ka tuig nga indi gihapon matuman ni Pueblo ang nasaad sa Perimeter Boundary Ordinance, kanselahon niya ang prangkisa kag pasiraduhan ang terminal. Ang problema lang suno sa konsehal amo ang alternatibo nga lugar para sa mga provincial jeepneys kag buses.