Iloilo City: Indi alalangay nga suktanay sa mga drivers sang depasahero nga jeep nga nagasulod sa fastcraft terminal sa Brgy. Progreso Lapuz, ginareklamo!

By: Jocelyn Gelloagan-Maque

Nagareklamo ang mga miembro sang Lapuz-Rizal Drivers Association bangud sa ginpahayag indi alalangay nga suktanay sa mga drivers sang depasahero nga jeep kon magsulod sa fastcraft terminal sa Barangay Progreso, Lapuz.

Suno kay Ms. Andrea Golez nga presidente sang transport association, may mga drivers nga nagahambal nga ginasukot gid sila sang 12 pesos kada sulod sa terminal.

Samtang may nagpabutyag nga maka-isa ka bes lang sila nga nagabayad sang 12 pesos.

Gin-ako ni Golez nga ini ang rason kon ngaa wala na nagasulod sa terminal ang iban nila nga miembro ilabe na kon isa lang ang pasahero bangud pierde sila.

Napalab-ut na ni Golez ang reklamo sa Philippine Ports Authority(PPA).

Suno kay Golez, ginhambalan siya sang PPA nga indi na ma-renew ang ila auxiliary permit.

Sang nagligad nga tuig, nagbayad ang grupo ni Golez sang masobra 2 mil pesos para sa permit agud makasulod sa terminal ang ila mga miembro.