Iloilo City: Mga on-duty jailguards nga natabuan sa pagpalagyo sang preso sa BJMP District Jail, pagakasuhan!

By: Jocelyn Gelloagan-Maque

Kaso nga negligence of duty ang mahimu atubangon sang mga jailguard kag jail warden sang Bureau of Jail Management and Penology (BJMP) District Jail sa Barangay Ungka, Jaro may kaangtanan sa pagpalagyo ni Dexter Lee sang San Juan, Molo sang Marso 8.

Suno kay Jail Officer 1 Ronald Canuway, imbestigador sang BJMP district office, maga-depende sa kabug-aton sang kaso ang ipatong sa mga jailguard on-duty sang nagpuga si Lee.

Tatlo ka bulan nga suspension ang atubangon sang jail guard kon simple neglect of duty ang iya offense kag dismissal from the service naman kon serious neglect of duty.

Kalakip sa mga gwardiya nga posible kasuhan amo sanday Senior Jail Officer 4 tony Simba, Jail Officer 1 Mateo Manlikis, Jail Officer 1 Jeofrey Fernandez, Jail Officer 1 Earl Binusa kag Jail Officer 1 Kent Sobresencia.