Iloilo City: ICPO, nagalaum nga makilala ang suspek sa pagpatay sa babaye nga nasapwan sa kwarto sa pension house; biktima, nakilala na!

By: Aine Grace Bravo

Nagapati si ICPO Spokesman Supt. Gilbert Gorero nga amat-amat masanagan ang motibo sa pagpatay kay Myrna Requintina, 62-anyus sang Cubay Norte, Bugasong, Antique kon makahatag na sang testimoniya ang iya mga himata.

Nakilala nga si Requintina kahapon paagi sa takus sang sapatos nga nakita sa sulod sang Room 104 sang Eros Pension House sa General Luna Street, City Proper sa diin ini nasapwan. Suno kay Gorero, may nakasulat nga mga impormasyon sa likod sang papel nga ginfollow-up sang mga pulis rason nga nakilala si Requintina. Madumduman Marso 15 sang gab-i nasapwan si Requintina sa idalum sang kama nga hublas, nagapos sang paha ang duha ka kamot, kag ginburambudan sang bayo sa ulo. May pilas man ini sang ginapatihan pagkalampos sa ulo.

Base sa record sang pension house, Marso 14 sang aga nag-check in si Requintina kag ginsundan sang lalaki nga wala pa nakilala pagkahapon. Ginahibalo na sang mga otoridad ang identity sang naka-upod sang biktima base sa kuha sang CCTV camera.