Iloilo City: (Update) Balo nga nagbalik sang malapit P100,000 nga nakita, pasidunggan!

By: Aine Grace Bravo

Pasidunggan sang Iloilo City police ang tampad nga Ilongga nga nagbalik sang nakita sini nga kuwarta sang nagligad nga semana.

Suno kay ICPO Spokesman Supt. Gilbert Gorero, ginakilala sang kapulisan ang pagpaninguha ni Mrs. Nancy Palacios sang Badiang, New Lucena nga mapangita ang tag-iya sang malapit P100,000 nga cash nga nasulod sa paper bag nga nakita sa sulod sang boutique. Sa staff conference sang ICPO, ginpahayag ni Gorero nga ginduso ni ICPO OIC Sr/Supt. Kashmir Disomangcop nga hatagan sang Certificate of Recognition si Palacios sa masunod nga Lunes.

Dalayawon suno sa iya ang pagkatampad ni Palacios nga wala nagmiter sang kuwarta nga indi iya. Nabalik sa tag-iya nga si Isidoro Fabela sang Jaro ang kuwarta sa bulig ni C/Insp. Jojo Tabaloc, hepe sang Police Station 1, paagi sa nakita nga resibo sa bag. Daku naman ang pasalamat ni Fabela nga nabalik ang kuwarta nga ginpahayag ginpdala lang sa iya agud ibakal sang bugas.