Janiuay: Menor de edad, gintiro sang wanted person!

By: Jocelyn Gelloagan-Maque

Patay ang menor de edad sa Bungol, Janiuay nga gintiro sang lalaki nga natukiban sang ulihi nga wanted person sa Concepcion.

Suno kay Senior Inspector Ferdinand Limbungan, hepe sang Janiuay Police Station, napatay si Rogerlio Casite, 17-anyos sang Barangay Bungol matapos gintiro ni Jun Obillos, 34-anyos sang Batite, Concepcion kag nagabantay sa manokan sa Barangay Bungol.

Ginhingagaw pa dala sa ospital si Casite apang napatay bangud sang patal nga pilas sa agtang tuga sang 12-gauge shotgun.

Ginpahayag nga ginpaguwa sa baylehan ang suspek bangud wala nakabayad sa gin-order nga ilimnon samtang may ginahimo nga aktibidad may kaangtanan sa kafiestahan sang barangay.

Gina-imbestigaran pa sang Janiuay Police ang rason kon ngaa gintiro ni Obillos ang biktima.