Iloilo City: Resolutions batuk sa ginapatindog nga City Mall kag gasolinahan sa Guimaras-Iloilo Ferry Terminal project site, suportado ni Mayor Jed Patrick Mabilog suno kay Councilor Plaridel Nava

By: Aine Grace Bravo

Suportado ni Mayor Jed Patrick Mabilog ang resolution sang city council nga nagahinyo sa alkalde nga mag-isyu sang cease and desist order sa ginpatindog nga City Mall kag gasolinahan sa project site sang Guimara-Iloilo Ferry Terminal sa Parola area.

Nagapakita lang ini suno kay Councilor Plaridel Nava nga wala gina-tolerate ni Mabilog ang illegal nga aktibidad nga wala nasaad sa gin-aprobahan nga Joint Venture Agreement. Bisan ang alkalde suno sa konsehal ang nakibot sang nahibaluan nga ginla-in sang Double Dragon Properties, Inc. ang nasaad sa terms of reference sang kontrata.

Ginpahayag ni Nava nga mahibaluan nila ang sabat sang alkalde sa pagbalik sini halin sa Metro Manila. Nagaguwa suno kay Nava nga paaman na lang ang GIFT project matapos natukiban nga 510 square meters lang sa 1.3 hektariya nga duta sang syudad ang patindugan sang ferry terminal.