Iloilo City: I-CAST Executive Director Iñigo Garingalao, nagpasalig nga imbestigaran ang reklamo sang taxi driver nga ginsabnit sang nagpakilala I-CAST agent ang iya driver’s license

By: Aine Grace Bravo

Nagpasalig si Iloilo City Anti-Smoking Task Force (I-CAST) Executive Director Iñigo Garingalao nga imbestigaran ang reklamo ni taxi driver Danilo Agarrado sang Brgy. Umilig, Buenavista, Guimaras nga gin-alegar ginkuhaan sang driver’s license sang nagpakilala taga-ICAST bangud sa paglapas sa Anti-smoking Ordinance.

Handa si Garingalao nga disiplinahon ang iya tinawo kon matuod ang alegasyon nga nagpang-sabnit sang lisensya sang driver kag nag-isyu sang Temporary Operator’s Permit (TOP). Aminado si Garingalao nga may mga drivers nga nagaba-is sa taga-ICAST kon madakpan nga nagalapas sa ordinansa. Apang ginapahanumdom niya sa iya mga tinawo nga mangin kalmado kag mag-upod sang pulis kon indi na mapunggan ang violator.

Gin-athag man ni Garingalao nga temporaryo niya ginpauntat sang Lunes ang pagkumpiskar sang driver’s license bangud sang madamo nga reklamo.