Iloilo City: Ginapatindog nga Guimaras-Iloilo Ferry Terminal, dapat tapuson antes komentaran suno kay Mayor Jed Patrick Mabilog

By: Aine Grace Bravo

Ginpanindugan ni Mayor Jed Patrick Mabilog nga sundon ang nasaad sa ginpirmahan nga joint venture agreement sa Double Dragon Properties Incorporated bangud legal.

Dapat suno sa iya nga hulaton nga matapos ang state-of-the-art nga Guimaras Iloilo Ferry Terminal antes mag-komento kon ano ang dapat nga ligwaton sa proyekto. Ginpabutyag man sang alkalde nga indi dapat pag-husgahan ang proyekto samtang ginatukod ilabe na ang kadakuon sini kag ang kapasidad nga maka-akomodar sang madamo nga pasahero. Indi man pabor si Mabilog nga i-revise ang proyekto bangud pirmado na sang magtimbang nga partido ang kontrata.

Una na ginreklamo ni Councilor Plaridel Nava nga wala ginsunod sang Double Dragon ang terms of reference sa JVA matapos nagpatindog sang mall kag gasolinahan sa project site.