Sara: Lalaki nga gintiro sang barangay tanod matapos gindudahan karelasyon sang iya asawa, indi na interesado magpasaka sang kaso!

By: Jocelyn Gelloagan-Maque

Indi na interesado nga magpasaka sang kaso si Fred Destacamento sang Barangay Taguhangin, Ajuy batuk sa barangay tanod nga nagtiro sa iya.

Suno kay PO1 Francis John Aricaya sang Sara PNP, ginpaguwa sa prisohan ang barangay tanod nga si alyas Juaning bangud natapos na ang iya reglamentary period sang Mayo 16 alas 10 sang aga.

Kon interesado ang pamilya suno kay Aricaya mahimo nga mapasakaan sang kaso nga frustrated murder ukon frustrated homicide si alyas Juaning.

Gintiro ni alyas Juaning si Destacamento sa tu-o nga ti-il matapos nadakpan nga nagpakighilawas sa iya asawa nga si alyas Nene sa ila balay sa Barangay Preciosa, Sara.