Pagdumala sang pribado nga entity sa MIWD, liwat ginduso ni Senate President Franklin Drilon

By: Aine Grace Bravo

Liwat nga ginduso ni Senate President Franklin Drilon ang pagpadumala sa Metro Iloilo Water District sa pribado nga entity bangud sang problema sini sa distribution kag supply.

Sa press conference kahapon, gin-athag ni Drilon nga binilyon ka pesos ang kinahanglanon agud makaayo ang distribution system kag wala sang available nga pundo ang MIWD rason nga kinahanglan ini nga i-operate sang pribado nga entity. Masobra 50% suno sa iya sang non-revenue water ukon nagaka-uyang nga tubig ang wala nagakadtu sa mga konsumidor.

Bangud ini suno sa iya sang mga guba kag daan nga tubo sang MIWD nga kinahanglan nga mailisan. Bisan si Presidente Noynoy Aquino ang nagakahangawa sa gina-experyensya nga krisis sa tubig sang syudad rason nga luyag sini nga masolbar ang isyu.