Iloilo City: Lalaki nga Nagtuyo suhulan ang mga Pulis agud Indi pagdakpon sa Checkpoint sa Jaro, Gin-preso!

By: Jocelyn Gelloagan-Maque

Gin-preso ang lalaki nga nadakpan sa checkpoint sang Jaro Police sa Barangay Buhang, Jaro bangud ginpahayag nga tuyo suhulan ang mga pulis agud indi siya pagdakpon.

Suno kay Inspector Ismael Gandarosa nga nagapamuno sa checkpoint, nasiplatan si Rex Patigas, 56 anyos sang Poblacion, Sara nga wala sang helmet rason nga ginpaparahan.

Apang imbes nga magdulog, ginpadasigan pa sini ang pagpadalagan sang motorsiklo. Nabalabagan sang isa pa ka pulis si Patigas kag wala sang ginpakita nga papeles.

Ginpahayag nga gintuyo nga hatagan ni Patigas sang P500 si Inspector Gandarosa rason nga ginpreso. Pasakaan si Patigas sang kaso nga bribery.