Iloilo City: Resolution ni Councilor Plaridel Nava nga Nagatuyo Imbestigaran ang Ginbutang nga Traffic Lights, Gin-aprubahan sang City Council

By: Jocelyn Gelloagan-Maque

Gin-aprubahan sang city council ang resolution ni Councilor Plaridel Nava, chairman sang Committee on Transportation, agud imbestigaran ang ginbutang nga traffic lights sa syudad sa boto nga 6-5.

Nagpabor sa resolution si Nava upod kanday Councilors Lex Tupas, Joshua Alim, Armand Parcon, Love-Love Baronda kag Rodel Fullon.

Nagpamatuk naman sanday Councilors Ed Peñaredondo, Carlos Guarin, Inday Lee Zulueta-Salazar, Jay Treñas kag R Leoni Gerochi.

Nag-abstain sa pagboto si Councilor Lyndon Acap samtang absent si Councilor Jason Gonzales.

Nagpatas pa sa 5-5 ang boto apang na-break sang nagboto sang YES si Tupas nga amo ang presiding officer sa session.

Ginduso ni Nava ang resolution matapos wala nagpakita sa ginpatawag nga dayalugo sang konseho subong nga aga ang mga department heads nga gin-imbitar nga ginalakipan nanday City Engineer Bobby Divinagracia, City Budget Officer Ninda Atinado, City Treasurer Katherine Tingson, Executive Assistant to the Mayor Jess Sio kag Bids and Awards (BAC) Committee Chairman Joren Sartorio.