Inmate sang BJMP District Jail sa Ungka, napatay bangud sa balatian base sa autopsy result

Iloilo City–(Update) Gindula ni Dr. Owen Lebaquin, medico legal officer sang PRO-6, ang foul play sa kamatayon sang preso sang BJMP Ungka District Jail nga si Rizalino Villanueva sang Fajardo, Jaro.

Sa autopsy result sa bangkay ni Villanueva, wala sang patimaan nga gingamitan sang puwersa ang preso kag wala man sang may nakita nga ginlampusan siya sang matig-a nga bagay. Posible nga balatian suno kay Lebaquin ang ginkamatay ni Villanueva bangud sa nakita nga massive hemorrhage sa baga sang preso nga compatible sa respiratory problem. Apang indi direkta mahambal suno sa iya nga may pneumonia ang inmate.

Ginpahayag nga nag-ubo lang kag gulpi nagtiskog si Villanueva sang Hulyo 29 sang aga kabangdanan nga gindala sa Western Visayas Medical Center apang gindeklarar ini nga napatay. (Aine Grace Bravo)