Iloilo City: Klase sa Tanan nga Level, Ginsuspender bangud sa Bagyo Hanna

Jocelyn Gelloagan-Maque

Ginsuspender ang klase sang tanan nga level sa syudad subong nga adlaw bangud sang mabaskug nga hangin dala sang Bagyo Hanna.

Gin-anunsyar ni acting Mayor Joe Espinosa III ang pagkanselar sa klase pasado alas-10 kaina sang aga.

Sakup sang kanselasyon ang klase halin elementarya tubtob kolehiyo sa pampubliko kag pribado nga mga eskwelahan. Nagbaha ang madamo nga dalanon sa syudad bangud sa wala untat nga ulan.

Ginpahanda man sang City Disaster Risk Reduction and Management Office ang mga local officials bisan pa nga malayo ang Bagyo Hanna.

Una na gin-report sang PAGASA nga bisan indi mag-landfall ang bagyo, pabaskugon sini ang hangin habagat nga magaresulta sang pag-ulan.