Klase halin pre-school tubtob high school sa Iloilo City, suspendido bangud sang malain nga panahon

Iloilo City–Ginsuspender ni Acting Mayor Joe Espinosa III ang klase sa pampubliko kag pribado nga mga eskwelahan halin pre-school tubtob high school subong nga adlaw.

Kasunod ini sang briefing kay Espinosa ni Mr. Darwin Papa sang emergency response unit sang syudad kag konsultasyon kay Mayor Jed Patrick Mabilog nga yara sa China. Ginpataasan suno kay Espinosa sang PAG-ASA ang rainfall alert sa syudad sa orange nga nagakahulugan sang mabaskug nga pagtupa sang ulan gani ginkanselar sini ang klase. Nakadepende naman suno kay Espinosa sa administrator sang mga kolehiyo ang pagsuspender sang ila klase.

Ginsuspender man sang Coast Guard-Iloilo Station ang biyahe sang fastcrafts kag magagmay nga RORO vessels. Samtang padayon ang pagbiyahe sang mga pumpboats pa-Guimaras kag dalagku nga RORO vessels sa Dumangas Port. (Aine Grace Bravo)