Jaro police, nagtukod sang investigating team nga magatutok sa kamatayon ni Adrian Navilla Jr

Jaro, Iloilo City–(Update) Nagtukod sang investigating team ang Jaro PNP agud tutukan ang kaso sang pagpatay kay Adriano Navilla Jr, ang trabahador sang Pyrocast Engineering sa MH del Pilar, Jaro nga nasapwan may pilas sang pagkabuno sa tiyan kag laslas ang leog.

Suno kay C/Insp. Herbert Ballego, hepe sang Jaro PNP, pamunuan ang team ni Sr/Insp. Ruel Fermo. Gin-umpisahan ang imbestigasyon matapos naguwa sa autopsy ni Dr. Owen Lebaquin, medico legal officer sang Police Regional Office (PRO) 6, sa bangkay ni Navilla nga wala ini naghikog kundi ginpatay.

Una nga ginpatawag sa imbestigasyon ang mga trabahador sang Pyrocast lakip na ang ulihi nga nakaupod ni Navilla sang gab-i antes ini ginpatay. Gin-ako ni Ballego nga blangko gihapon sila sa motibo sang krimen kag misteryo man kon paano ginpatay ang biktima. (Aine Grace Bravo)