(Update) Joint Committees nga naga-imbestigar sa isyu sang traffic lights sa syudad, nakapadala na sang mga pamangkot sa mga concerned department heads

Iloilo City–Nakapadala na sang compiled questions ang joint committees sang City Council kahapon may kaangtanan sa kontrobersyal nga pagbakal sang mga traffic lights sa syudad.

Partikular nga gin-address ang mga pamangkot kanday City Engineer Bobby Divinagracia kag Bids and Awards Committee (BAC) Chairman Joren Sartorio. Gin-athag ni Councilor Jason Gonzales nga sanday Sartorio kag Divinagracia lang ang makapa-athag sa proseso sang bidding ilabe na ang change order sa proyekto.

Wala sang may ginbutang nga deadline si Gonzales sa ginpadala nga mga pamangkot apang hatagan sini sang isa ka semana ang duha ka department heads. Mahimo suno sa iya nga makapaguwa sang findings ang joint committees kon makumbinser sila sa sabat sang duha ka department heads. (Aine Grace Bravo)