4 ka Menor de Edad nga ginapatihan Suspects sa Pagpatay sa Call center Agent sa La Paz, Nadakpan!

Iloilo City (UPDATE) — Nadakpan ang apat ka menor de edad nga ginapatihan suspects sa pagbuno patay sa call center agent sa sulod sang sementeryo sa Jereos Extension, La Paz kagab-i.

Isa sa apat ka mga suspek ang nag-ako nga nagpakig-transaksyon ini sa biktima nga si Ricky Ventar, 35-anyos sang Dumarao Capiz.

Suno kay alyas Toto, 16-anyos sang Barangay San Isidro, La Paz, siya ang nag-text sa biktima nga makit-anay sila sa sementeryo.

Gintudlo ni Toto ang kaupod nga si alyas Sunog nga amo ang nagbuno patay kay Ventar nga ginpanghiwala naman sini.

Magluwas sa apat ka nadakpan, may duha pa ka menor de edad nga ginapangita ang kapulisan nga ginatudlo may kahilabtanan sa krimen.

Nasapwan si  Ventar  nga may pilas sang pagkabuno sa isa sa mga pantyon sa Jereos Extension Cemetery kagab-i.

Si Ventar ang ginpahayag nagatrabaho sa HR Department sang call center sa Molo.

Natalana naman nga ipaidalum sa autopsy ang bangkay sang biktima. (JoMaque)