Taxi driver, pilason matapos ginhold-up kag ginbuno pa sa Mandurriao

Iloilo City — Kritikal sa ospital ang taxi driver nga ginholdap kag ginbuno pa sang mga suspetsado sa Q. Abeto, Mandurriao kaina sang kaagahon.

Ginkilala ang biktima kay Lito Ombrero, 44 anyos sang Barangay Lanit, Jaro nga may pilas sa leog kag ibabaw sang mata.

Natalana ini nga operahan sa Western Visayas Medical Center.

Mismo ang hinablos sang tag-iya sang TR taxi ang nakakita kay Ombrero nga pilason sa sulod sang ginadala nga unit pasado alas-12 kaina sang kaagahon.

May narecover ang mga pulis nga tatlo ka kutsilyo sa taxi nga ginapatihan ginapanag-iyahan sang mga suspek.

Indi pa ma-establisar kon pila ang nakuha ka Ombrero bangud indi ini ma-istorya sa ospital.

Wala naman sang nakakita sa mga suspek bisan pa nga madamo sang pulis sa palibot malapit sa area sa diin nakita ang taxi. (JoMaque)