Mga police nga nag-disperse sa nag-protesta nga mga Miembro sang Cause-oriented Groups, mga Estudyante kag Professor sang UPV sang nagligad nga semana, ginpasakaan na sang kaso kriminal

Iloilo City — Ginpasaka na ang kaso kriminal batuk sa mga police nga nag-disperse kag nag-aresto sa mga estudyante, professor sang University of the Philippines Visayas (UPV) kag mga miembro sang cause-oriented group sang Septyembre 24 sa General Luna Street, City Proper.

Nagapangatubang sang kaso nga Arbitrary Detention, Prohibition, Interruption and Dissolution of Peaceful Meetings, Grave Threats, paglapas sa Batas Pambansa 880 (Peaceful Assembly) kag Grave Coercion sanday Iloilo Police Provincial Office (IPPO) Director Senior Supt. Cornelio Salinas, Iloilo City Police Office (ICPO) Director Sr/Supt Khasmir Desomangcop, Superintendent Adrian Acollador kag Police Officer Gerard Madriaga kag certain Police Officer Francisco.

Gin-file ang kaso kaina sa City Prosecutors Office nanday Mr. Reyland Vergara sang Dungon C, Manduriao; Winefredo Doblizo sang Block 8 Sinikway Lapuz; Rhea Ogoy sang Barangay Danao, City Proper; Rene Paredes sang Lapuz Norte, Lapuz; Randy Vergara sang Cuartero Street, Jaro; Ana Marie Premalion sang Barangay Bonifacio Arevalo kag Gabriel Guillen sang Land Heights Subdivision Phase 2, Arevalo.

Nag-protesta ang mga miembro sang cause-oriented groups kaupod ang mga estudyante kag professor sang UP Visayas agod pamatukan ang ginaproponer nga P2.2 billion nga buhin sa pundo sang mga State Universities and Colleges (SUCs) sa 2016. (JoMaque)