Update: Bangkay nga nasapwan pagkatapos sang engkwentro sa Tubungan sa tunga sang Philippine Army kag ginapatihan NPA, nakilala!
Tubungan, Iloilo–Nakilala na ang bangkay sang lalaki nga nasapwan sa engkuwentro sa boundary sang Barangay Buenavista kag Batga kahapon sang kaagahon.
Ginkumpirmar ni Major Ray Tiongson, spokesman sang 3rd Infantry Division sang Philippine Army, nga miembro sang New People’s Army ang napatay nga si Harold Tabsing sang Buenavista, Tubungan. Sa ila nga pagpangusisa, natukiban nga madugay na wala nagapauli sa iya mga himata sa nasambit nga lugar si Tabsing. Posible suno kay Tiongson nga wala nahibaluan sang pamilya ni Tabsing nga nagsulod ini sa hublag.
Nasapwan sa tupad sang bangkay ni Tabsing ang isa ka m16 rifle, isa ka 45-caliber pistol, mga bala kag mga magazine kag personal nga kagamitan. Napatay si Tabsing sa hot pursuit sang mga tropa matapos ang engkuwentro sa Barangay Ambarihon sa amo man nga banwa Lunes sang hapon sa diin napilasan si Corporal Paul Zaldo nga yara na sa estable nga kondisyon. (Aine Grace Bravo)