Mga empleyado sa Munisipyo sang Maasin, nagsoksok sang Itom nga bayo bilang Protesta sa indi pagpasweldo sa ila

Maasin, Iloilo — Nagsoksok sang itom nga bayo ang mga empleyado sang munisipyo sa Maasin bilang protesta sa mga miembro sang Sangguniang Bayan may kaangtanan sa indi nila pagbaton sang sweldo halin Setyembre 15 tubtub 30.

Nagtambong ang mga empleyado sa regular session sang Sanggunian kaina agud ipakita ang ila paghugpong batuk sa ginpahayag pamulitika sang pila ka SB members.

Tunga sa bulan nga wala nakabaton sang sweldo ang mga empleyado bangud nagpamalibad ang pila ka SB members nga hatagan sang otoridad ang gindesignar nga municipal treasurer agud mangin signatory sang depository bank.

Nagretiro ang una nga municipal treasurer sang banwa rason nga nagdesignar sang bag-o si Maasin Mayor Mariano Malones.

Apang sang ginpangayuan sini sang authority sa Sanggunian, wala ginpaboran sang apat ka SB members lakip na si Vice Mayor Rene Mondejar.

Ginrason sang mga SB members nga asawa sang isa ka konsehal ang gindesignar nga municipal treasurer nga may plano magpadalagan sa pagka-bise alkalde sang banwa. (JoMaque)