Coast Guard-Iloilo, maga-imbestigar sa pagkulob sang MB Tawash

Iloilo City — Imbestigaran sang Coast Guard Iloilo ang pagkulob sang MB Tawash sa Iloilo Strait sang Domingo.

Tutukan sang imbestigasyon suno kay Lieutenant Junior Grade Edison Diaz, commander sang Coast Guard Iloilo station, ang ginhimo sang kapitan sang pumpboat agud masiguro nga safe ang iya mga pasahero.

Hibaluon suno kay Diaz kon ngaa wala napapirmahan sa on-duty coast guard personnel nga si Petty Officer 3 John Catelo ang Master’s Declaration of Safe Departure (MDSD).

Sa inisyal nga imbestigasyon ni Diaz, natukiban nga naglakat ang MB Tawash bisan wala pa na-double check sang Coast Guard ang sakayan nga nagkulob sa tunga-tunga sang dagat matapos nakasugata sang pugada.

Sa kasubong nga sitwasyon, ginapabalo suno kay Diaz ang ila counterpart sa point of destination sang pumpboat agud madakup ang kapitan kag mamultahan sang iya violation bangud naglakat nga wala sang clearance. (JoMaque)