Councilor R Leone Gerochi, gindepensahan ang ginpasar nga Resolution nga naga-endorso sang mga applications sang provincial jeepneys sa LTFRB nga ilisan ang frangkisa sa Iloilo City
Iloilo City — Resonable ang resolution ni Councilor R Leone Gerochi, chairman sang Committee on Transportation sa City Council nga nagahingyo sa LTFRB nga ilisan ang frangkisa sang mga provincial jeepneys.
Gin-athag ni Gerochi nga nasaad sa resolution nga ang point of destination sang provincial jeepney amo ang Iloilo City sa baylo nga tubtub lang sa perimeter boundary terminal.
Kwestyunable suno kay Gerochi kon ang point of destination amo ang perimeter boundary terminal kag kon may car pass puwede makasulod.
Sa nasambit nga resolution, puwede sa gihapon magamit ang car pass suno sa konsehal kag indi matandog ang provision sang Perimeter Boundary Ordinance (PBO).
Ang importante suno kay Gerochi nga ang point of destination sang mga provincial jeepney amo ang Iloilo City agud indi maiguan ang Joint Adminstrative Order (JAO) sang LTFRB kag LTO kag ang city government.
Gin-aprobahan kahapon sa regular session sang City Council ang resolution ni Gerochi.
“No To Old Car Pass System”
Nagalaum si Iloilo City Loop Alliance of Jeepney Owners and Drivers Association (ICLAJODA) president Boyet Parcon nga indi pag-ibalik sang syudad sa daan nga sistema ang hatagay sang car pass sa mga provincial jeepneys.
Suno kay Parcon, dapat istriktuhon sang TMTRO kag sang city government ang hatagay sang car pass agud indi maginamo ang city-loop kag provincial jeepneys.
Ginpa-athag naman ni Parcon nga gintugtan na sadto ang mga provincial jeepneys nga pa-amendaran ang ila frankisa kag himuon Iloilo City ang point of destination.
Apang ginpa-untat ini ni Mayor Jed Patrick Mabilog sang Marso subong nga tuig.
Wala nagdumdom si Mr. Porsing Parreño, presidente sang Confederation of Iloilo Provincial Jeepney Owners and Drivers Association (CIPJODA) nga iduso ni Gerochi sa city council kahapon ang resolution.
Apang komporme si Parreño nga i-control sang syudad ang pagsulod sang provincial jeepneys sa syudad paagi sa car pass system.
Pabor man si Parreño sa pahayag ni ICLAJODA president Boyet Parcon nga ilisan ang ginapanagtag nga car pass bangud ginahimo nga negosyo sang iban nga tawo. (JoMaque)