16-anyos nga dalaga nga ginreport missing sang iya pamilya sa Barotac Nuevo, ginpahayag nga naglain ang buot rason nga nag-upod sa iya nobyo sa Pavia

Iloilo–Naglain ang buot sang 16-anyos nga 1st year IT student sang WVSU sa iya pamilya kabangdanan nga wala nagpauli sa ila balay sa Barangay Bungka, Barotac Nuevo.

Apang nagbalibad na si PO2 Glory Galas sang Pavia PNP nga i-detalye kon ano gid ang ginlainan sang buot sang dalagita. Duha ka adlaw ini nga nag-tiner sa balay sang iya nobyo nga 19-anyos antes nakit-an kagab-i. Gin-cordon pa sang mga pulis ang balay sang nobyo agud indi magpalagyo ang dalagita.

Nagpasalamat ang himata sang babaye sa mga nagbulig agud nga matultulan ini. Naglapta sa Facebook ang litrato sang dalagita nga ginreport nga missing kag ginkabalak-an pa sang iya pamilya nga gindala sang iya stalker.

Nagpauli ang dalagita matapos gin-ulu-ulohan sang iya amay kag sang pamilya sang iya nobyo. (Aine Grace Bravo)