Amay nga nagpapreso sang iya 16-anyos nga bata nga lalaki bangud sa pagpangawat agud ibakal sang illegal drugs, wala naghinulsol sa iya ginhimo

Mina, Iloilo–Wala ginhinulsulan sang amay ang pagpa-preso niya sa 16-anyos niya nga anak agud nga madisiplina kag malikaw sa pagamit sang illegal nga druga.

Suno kay alyas Ronnie sang Barangay Cabalabaguan, ini ang nakita niya nga paagi agud maluwas sa malain nga epekto sang illegal drugs si alyas Nonoy. Mas maayo pa nga makita niya nga mapreso ang iya anak sang sa mabalitaan sini sa ulihi nga na-ospital ukon yara na sa morgue bangud na-involve sa kinagamo bangud sa pagamit sang illegal nga druga.

Indi man sini luyag nga maperwisyo pa ni Nonoy ang iban nga tawo. Natalupangdan sang amay nga nagabisyo ang anak sang naglain ang pamatasan sini kag nagakadula ang ila kagamitan sa balay bangud ginakawat ni Nonoy kag ginabakal sang illegal nga druga.

Ginpapreso ni Ronnie si Nonoy matapos ginkawat sini ang battery sang ginabiyahe niya nga jeep kag ginbakal sang illegal drugs kag tsinelas. (Aine Grace Bravo)