Pila ka items sang 2016 proposed budget sang syudad, ginkwestyun ni Councilor Plaridel Nava

Iloilo City–May pag-alang alang si Councilor Plaridel Nava sa pila ka mga items sang 2016 proposed annual budget sang city government.

Kasunod ini sang budget deliberation kahapon sa diin nakita sang konsehal nga may pila ka items sa budget nga indi kinahanglanon bangud sobra ang ginpa-in nga pundo. Gintumod ni Nava ang nagalalapaw nga budget allocations sa mga job hires kag casual employees nga ginabanta nagalab-ot sa 250 milyones pesos. Ginkuwestyun ni Nava ang mga special projects nga nabutang sa items sang pila ka departmento agud mapa-inan sang pundo para sa sweldo sang mga casual employees.

Ginpahayag ni Nava nga mahimo makasuhan sang grave abuse of authority sa Ombudsman ang mga opisyal sang city government kon iduso ang pag-aprobar sang 2016 budget. Apang ginalauman na sang konsehal nga mapasar ang annual budget bangud nahibaluan na niya ang mangin resulta sang botohay sa konseho. (Aine Grace Bravo)