Sen. Grace Poe, handa na magpanguna sa Senate investigation sa tuyo nga pagsaka sang armado nga mga tawo sa Aksyon Radyo Iloilo

Handa na si Senador Grace Poe, chairman sang Senate Committee on Public Order and Dangerous Drugs, nga magpamuno sa imbestigasyon sa tuyo nga pagsulod sang grupo ni PDEA-identified top drug personality Melvin Odicta Sr sa building nga gina-okupar sang Aksyon Radyo Iloilo sang Nobyembre 19 sang kaagahon.

Sa iya mensahe paagi kay Prince Golez nga Senate beat sang pahayagan nga Panay News, ginpabutyag sang senadora nga indi ini magpasugot nga i-bully lang ukon pahugon ang mga Ilonggo. Matigdas man sini nga ginpahayag nga bisan babaye siya, ipakigbato niya ang laye.

Gintalana ang Senate investigation sa Disyembre 10 sa 6th Floor sang Iloilo Provincial Capitol halin alas-10 sa aga tubtob alas-3 sang hapon. Nabutang sa resolution sang senadora nga natabu ang tuyo nga pagsaka sa estasyunan bangud sang aktibo nga kampanya sang Asyon Radyo Iloilo kontra illegal drugs, corruption kag iban pa nga krimen sa syudad.

House’ Probe

Kasado naman ang separado nga imbestigasyon sang Kamara sa natabu sa Aksyon Radyo. Ginfile sang Disyembre 1 nanday Bayan Muna Representatives Neri Colmenares kag Carlos Isagani Zarate ang House Bill No. 2546 nga naga-direct sa House Committee on Dangerous Drugs kag Public Information sa paghimo sang non-site joint investigation in aid of legislation tuhoy sa natabu. Katuyuan sang imbestigasyon nga ma-address ang kabug-usan nga sitwasyon sang mga katapo sang media kag ang nagapadayon nga kultura sang impunity sa pungsod paagi sa paghatag sang legal kag institutional nga tikang agud maproteheran kag ma-uphold ang press freedom.

Ginkonfirmar ni Congressman Colmenares nga nagsulat na siya kay House Speaker Feliciano Belmonte nga italana na ang fetsa sang hearing kag ginduso nga hiwaton ang imbestigasyon sa syudad sang Iloilo agud mahapos nga makapasakup ang mga testigo kag iban pa nga resource persons. (Aine Grace Bravo)