Mayor Jed Patrick Mabilog, nagpasalig sa mga ambulant vendors nga makabaligya sila sa bag-o nga terminal sang Vallacar Transit

Iloilo City–Nagpasalig si Mayor Jed Patrick Mabilog sa mga vendors sa Tagbak Terminal nga makabaligya sila sa bag-o nga terminal sang Vallacar Transit sa Buhang, Jaro antes ang paskuwa.

Ginhimo ini sang alkalde sa iya nga pagpakigsapol sa mga vendors kahapon kaupod sanday Councilor R. Leone Gerochi, chairman sang Committee on Transportation sang City Council kag si Monsignor Meliton Oso. Suno kay Mrs. Myra Hari-on, presidente sang Tagbak Vendors Association, nagpromisa ang alkalde nga makalibod sila subong nga semana matapos na-istorya ang tagdumalahan sang Vallacar Transit.

Apang i-negosyar sang alkalde sa tagdumalahan ang concern sang mga vendors bangud dumilian sila nga makabaligya sang balot, itlog sang pugo kag mani bangud nga mahigko sa sulod sang salakyan. Sa baylo, ginduso sang Vallacar Transit nga ibaligya sang mga vendors ang ila mga produkto sa terminal. Ginbalibaran naman ini ni Hari-on sa pagsiling nga mahal ang presyo sang mga produkto sa Vallacar Transit Terminal kag indi nila ini masarangan. (Aine Grace Bravo)