Pagpa-imbestigar ni Mayor Jed Patrick Mabilog sa naglapta nga “white paper”, nagapakita nga indi ini sinsero sa kampanya kontra illegal nga druga suno kay Councilor Plaridel Nava

Iloilo City — Na-alarma si Councilor Plaridel Nava sang ginpatutukan ni Mayor Jed Patrick Mabilog ang nagalapta nga “white paper” nga nagatudlo sa alleged Nava-Golez crime syndicate nga utok sa mga wala nasolbar nga kaso sa syudad.

Nagapakita suno kay Nava nga indi sinsero si Mabilog sa kampanya kontra illegal drugs bangud ginahingabot kag ginalagas sini ang mga nagakontra sa ginadumilian nga druga.

Wala man suno sa iya ginpa-verify sang alkalde kon matuod ang kaundan sang “white paper” kag sa baylo, ginhatagan pa sang deadline ang Iloilo City Police Office agud resolbahon ang mga kaso nga ginatumod sa sulat.

Ginapahayag ni Nava nga indi lang irregular kundi illegal ang mandu ni Mabilog bangud nga hearsay ang ginasandigan sini.

Gin-akusaran sang konsehal ang gintawag sini nga propagandista sang alkalde nga amo ang naghimo kag nagpalapta sang “white paper.” (JoMaque)