Kaso nga murder, gin-file na batuk kay SPO1 Arnold Lizada nga gintudlo nagtiro patay sa iya opisyal nga si Inspector Christian Lee Nelmida

Iloilo — (UPDATE)  Ginpasaka na kaina sang udto ang kaso nga murder sa pugante nga si SPO1 Arnold Lizada, gintudlo nga nagtiro patay kay Inspector Christian Lee Nelmida nga team leader sang 2^nd Maneuver Platoon sa Jibolo Janiuay.

Ginmandu naman ni Iloilo Police Provincial Office (IPPO) OIC  Roderick Augustus Alba ang pag-untat sang massive manhunt operation kag sa baylo, ginpamonitor sini ang mga aktibidad nga makadala sa pagkadakup kay Lizada.

Bukas gihapon ang IPPO suno kay Alba para sa pag-surrender ni Lizada kag ginlaygayan ini nga indi na paghulaton ang paguwa sang warrant of arrest batuk sa iya.

Pasakaan man si Lizada sang Malversation of Government Property bangud sa pagdala sini sa pagpalagyo sang government-issued firearms, illegal possession of firearm sa pagamit sini sang lain nga pusil sa krimen, administrative case nga grave misconduct kag AWOL case.

May salabton man ang iban pa nga PNP personnel nga natabuan sa crime scene bangud nga nakapalagyo ang suspek bisan sa sulod sang kampo sang 2^nd Maneuver Platoon natabu ang pagpangluthang. (JoMaque)