Councilor Armand Parcon, nakibot sang ginpahayag pagtawag sa iya nga “traidor” ni Councilor Ed Peñaredondo

Iloilo City — Nakibot si Councilor Armand Parcon sa ginpahayag pagtawag sa iya nga “traidor” ni Councilor Ed Peñaredondo.

Kasunod ini sang pagboto ni Parcon pabor sa resolution sadto ni Councilor Joshua Alim nga nagapanawagan sang senate investigation sa tuyo nga pagsaka sang grupo ni Melvin Odicta, Sr sa Aksyon Radyo Iloilo sang Nobyembre 2015.

Suno kay Parcon, maathag ang iya pahayag sa mga kaupod sa konseho nga suportahan niya ang anuman nga tikang kon naga-involve sang interest sang media kag iban pa nga indibidwal.

Sa pagkamatuod suno kay Parcon, may mga resolution siya nga ginpasar nga nagakondenar kag nagapanawagan sang imbestigasyon sa mga nagakatabu nga pagpang-harass.

Ginbalik pa ni Parcon kay Peñaredondo ang pamangkot kon sin-o ang nag-traidor sa ila.

Wala nakapasar ang resolution bangud sanday Alim, Parcon kag Councilor Plaridel Nava lang ang nagpabor samtang nag-abstain ang walo pa ka mga konsehal. (JoMaque)