Update: Salakyan kag Kagamitan sang Manobsorbete nga Ginpatay sa Sambag Jaro, Na-recover sa Tacas Jaro

Iloilo City — Na-recover na ang salakyan sang manug-sorberte nga ginpatay sang nagligad nga semana.

Narecover ang motorsiklo nga may sidecar nga ginakargahan sang sulodlan sang ice cream sa Zone 5 Barangay Tacas, Jaro pasado alas 2 kahapon sang hapon lakip na ang pagkabutang sang mga biktima.

Ginkilala ang mga biktima nga sanday Andrew Igpaz, 25-anyus kag RJ Alumia, 31-anyus sang Sitio Balud Barangay Anilao, Pavia.

Ginapatihan ni Chief Inspector Herbert Ballego, ang chief of police  sang JaroPNP nga sa nasambit nga lugar ginpatay ang mga biktima antes ginsulod sa sako ang lawas kag ginga-id sa tigbaw sa higad sang suba sa Sambag Jaro.

Patimaan ang nabilin nga tinulo sang dugo suno pa kay Ballego.

Nagpa-blotter ang pamilya sa Pavia PNP nga naghalin sa balay sanday Igpaz kag Alumia pasado alas 10 sang aga sang Enero 9 apang wala na nakapa-uli kag sang Enero 10, nakit-an nga nasulod sa sako ang ila lawas nga lunsay may pilas sang pagkalabo sa li-og. (Nemesio Martirez)