Pagpakabit sang streamers kag pagpanagtag sang mga campaign material sang mga kandidato sa 2016 elections, pagadumilian sa Kasadyahan kag Dinagyang Festival

Iloilo City — Igadumili ang pagpakabit sang streamer kag mga campaign materials sang mga kandidato sa mga judging area sa tion sang Kasadyahan kag Dinagyang Festival 2016.

Ini ang nahisugtan sa sinapol sang Iloilo Dinagyang Foundation Incorporated (IDFI) kag City Tourism Office.

Suno kay IDFI President Ramon Cua-Locsin, pagalimitahan man ang manughambal sa programa sa Iloilo Freedom Grandstand sa diin mahimo lang makahatag sang mensahe sanday Mayor Jed Patrick Mabilog, City Lone District Congressman Jerry Treñas, Senate President Franklin Drilon kag Governor Arthur Defensor.

Samtang lima na ka mga ambassador an komfirmado nga magatambong sa kahiwatan.

Suno kay City Tourism Officer Junel Ann Divinagracia, magatambong ang mga ambassador sang Estados Unidos, Russia, China, Germany kag Indonesia.

Ginalauman man nga magadugok ang mga balikbayan halin sa nagkalain-lain nga pungsod. (JoMaque)