Dinagyang Update: Masobra 1 ka libo ka mga personnel halin sa PRO 6, maga-augment sa Kasadyahan kag Dinagyang Festival 2016

Iloilo City — Ginbanta sa masobra isa ka libo ka PNP personnel halin sa Police Regional Office 6 ang maga-augment sa Kasadyahan kag Dinagyang Festibal 2016 sa Enero 23 kag 24.

Magahalin ang mga personnel suno kay PRO 6 spokesperson Supt. Gilbert Gorero sa mga probinsya sang Aklan, Capiz, Antique kag Guimaras.

Ini sila ang magabulig sa Iloilo City Police Office sa pagbantay sa checkpoints kag OPLAN Kapkap agud mapat-ud nga indi makasulod ang mga armas lakip na ang illegal nga druga sa sentro sang syudad nga ginahiwatan sang mga aktibidad.

Suno kay Gorero, 9 ka mga eskuwelahan ang magaserbi nga billeting areas sang maga-augment nga PNP personnel kag ang Iloilo Dinagyang Foundation Inc., (IDFI) ang magasabat sang ila pagkaon.

Idumili man suno kay Gorero ang pagamit sang mga botelya kag mataliwis nga bagay kasubong sang mga asalan sa mga kiosko.

Lakip man nga idumili ang pagpanigarilyo sa mga pampubliko nga lugar base sa City Anti-Smoking Ordinance.  (JoMaque)