Mga municipal police stations sa probinsya, wala-tuo ang mga operasyon kontra sa illegal drugs

Iloilo–Sunod-sunod ang operasyon sang mga municipal police stations batuk sa illegal nga druga.

Nadakpan ang number 2 drug personality sa Passi City. Nakuha kay Miniano Panisales, 35-anyos sang Sitio Mapili, Brgy. Man-it, ang lima ka sachets sang suspected shabu, 750 pesos nga cash lakip ang buybust money kag replica sang 45-caliber pistol.

Arestado man sa buybust operation ang tricycle driver nga si Rodel Roldan sang Lopez Jaena Ward, Pototan. Nakuha sa iya ang tatlo ka sachets sang suspected shabu, cellphone kag 217 pesos nga cash lakip ang buybust money.

Sa pihak nga bahin, nadakpan sa akto nga nagadaho sang isa ka sachet sang suspected shabu sa police poseur-buyer si Erwin Campoy, 29-anyos sang Brgy. Sta. Cruz, San Miguel, Iloilo. May nakuha pa gid nga pito pa ka sachets sang suspected shabu kag mga drug paraphernalia kay Campoy. Ginpahayag sini nga nagakuha siya sang supply sang illegal drugs sa Barangay Bakhaw, Manduriao.

Samtang arestado man sa buybust operation sa Barangay 9 ang number 6 drug personality sa Tigbauan kaina sang kaagahon. Nadakpan si Adrigel Mar Taleon sang Barangay Dorong-an sa amo man nga banwa. Nakuhaan si Taleon sang lima ka sachets sang suspected shabu kag buybust money.

Gina-preparar na sang nagkalain-lain nga police stations ang kaso nga ipasaka sa mga nagkaladakpan. (Aine Grace Bravo)