CIPJODA Pres. Porsing Parreño, ginhangkat si Mayor Jed Patrick Mabilog nga pasudlon ang mga provincial jeepneys sa syudad

Iloilo City — (UPDATE) Ginhangkat ni Mr. Porsing Parreño, presidente sang Confederation of Iloilo Provincial Jeepney Owners and Drivers Association (CIPJODA) si Mayor Jed Patrick Mabilog nga pasudlon sila sa Iloilo Terminal Market.

Ini ang alternatibo nga suhestyun ni Parreño sa baylo nga pasudlon ang mga provincial utility jeepneys sa Joroshely terminal sa Balantang Jaro kag Vallacar Transit terminal sa Buhang Jaro matapos ginsiraduhan ang Tagbak terminal.

Pananglitan pasugtan nga makasulod sa Iloilo Terminal Market, nagpasalig si Parreño nga mangin komportable ang mga pasahero padulong sa syudad.

Halin alas 6 tubtub alas 9 sa aga lang tugtan nga makasulod sa Iloilo Terminal Market kag pagkatapos sang gintalana nga oras, magasulod ang provincial jeepneys sa syudad gamit ang carpass.

Indi gid magsulod ang provincial jeepneys sa terminal sang Vallacar Transit kag Joroshely bangud kadam-an sang ila mga unit ang wala pa makapa-amiendar sang frangkisa.

“Options”

Gina-welcome naman ni Atty. Mark Piad, abogado kag spokesperson ni Mayor Mabilog ang suhestyun ni Parreño.

Suno kay Piad, isa ini sa posible options kon indi maaprobahan sang city council ang paghatag sang franchise sa Tagbak terminal.

Gin-athag naman ni Piad mnga wala na nagpangabay ang alkalde sa sity council nga maghiwat sang special session bangud nagpasalig si Transportation Committee chairman Councilor R Leone Gerochi nga maaprobahan sa Pebrero 2 ang paghatag sang franchise sa Tagbak terminal.

Indi man maghatag sang provisional authority ang alkalde agud maka-operate ang Tagbak terminal bangud city council ang may poder. (JoMaque)