Linibo ka supporters sang Liberal Party, ginalauman maga-upod sa kick off rally sang partido sa Freedom Grandstand

Iloilo City — Linibo ka supporters sang Liberal Party ang ginalauman nga maga-upod sa kick off rally sang partido sa Freedom Grandstand buwas sa hapon.

May kaangtanan sa daku nga event sa diin ginapa-abot nga magatambung si Presidente Noynoy Aquino, pagasiraduhan sang Transportation Management and Traffic Regulation Office (TMTRO) ang bug-os nga stretch sang dalan JM Basa halin alas-3 buwas sa hapon tubtob alas-10 sa gab-i.

Sa pagsugod buwas sang campaign period para sa mga national candidates sa Mayo 9 nga election, hiwaton sang LP ang political rally sa syudad pagkatapos sang parada sa Roxas City, Capiz buwas sa aga kag “Meet and Greet sa Passi City.

Mabatian buwas sa rally ang mga plataporma nanday LP standard bearer Mar Roxas kag Vice Presidential candidate Leni Robredo kag sang senatorial slate sang daang matuwid.

Hiwaton naman ang grand rally sang iban pa nga nagapadalagan sa pagka-presidente kag vice president sa nagkalain-lain nga lugar sa pungsod. (JoMaque)