Lote nga patindugan sang mas daku nga Iloilo Freedom Grandstand, nabakal na sang City government

Iloilo City--Nabakal na sang City government ang bakante nga lote sang Panay Railways agud patindugan sang mas daku nga Iloilo Freedom Grandstand.

Kasunod ini sang pag-aprubar sang City Council sang resolution nga nagahatag sang otoridad kay Mayor Jed Patrick Mabilog nga magpirma sa memorandum of understanding (MOU) sa tunga sang Bureau of Customs kag Tourism Infrastructure and Enterprise Zone Authority (TIEZA) para sa restoration sang Sunburst Park sa likod sang Freedom Grandstand. Ginbanta ni Councilor Ed Peñaredondo, chairman sang Committee on Rules, sa 32 milyones pesos ang balor sang masobra 2,600 square meters nga duta nga bayaran sa sulod sang tatlo ka tuig.

Suguran subong nga tuig ang pag-demolish sang Freedom Grandstand agud mapalapad kag mapatahum ang Sunburst Park nga nahamtang sa duta sang Bureau of Customs. Ginalauman naman nga mahingagaw sa 2017 Dinagyang Festival ang bag-o nga Iloilo Freedom Grandstand.

Base sa MOU, ang TIEZA ang maga-implementar sang restoration project kag City government ang magadumala, maga-mentinar kag maga-operate sa tion nga matapos ang proyekto. (Aine Grace Bravo)