UPDATE: Suspek sa pagkawat sang mga alahas sa pawnshop sa Passi City, nadakpan sa Pototan!

Pototan, Iloilo–Nadakpan ang isa sa mga ginatudlo nga nagsulod kag nagpangawat sa Christine & Grace Pawnshop sa Passi City sang nagligad nga semana sa diin ginabanta sa isa ka milyon ka pesos nga balor sang mga alahas ang nadula.

Nadakpan si Ramil Ajino, 23 sang Barangay Cubay, Lambunao sang gintingub nga pwersa sang Passi City kag Pototan police sa Barangay Rumbang, Pototan kagab-i. Gin-aresto man sanday Ramona Panes, 49 sang Barangay Rumbang, kag Renuel Lopez nga gintudlo kahimbon ni Ajino.

May nakuha nga mga alahas, pusil kag granada kay Ajino nga nag-ako nga kaupod siya sa pagsulod sa pawnshop. Gintudlo sini ang duha pa ka lalaki nga amo ang kaupod niya pero at-large pa tubtob subong.

Magluwas sa mga alahas, nadula man ang masobra Php6,000 nga cash nga nasulod sa drawer. (Aine Grace Bravo)