Gov. Arthur Defensor, naghatag sang chansa kay IPPO Director Roderick Augustus Alba nga solbaron ang sunod-sunod nga shooting incidents sa probinsya

Iloilo City — Hatagan sang kahigayunan ni Iloilo Police Provincial Office (IPPO) Director Roderick Augustus Alba nga masolbar ang mga krimen sa probinsya.

Gin-athag ni Governor Arthur Defensor nga bag-o pa lang nga nagpangalagad si Alba apang indi na kinahanglan nga diktahan bangud nakahibalo ini sang iya dapat himoon.

Pahayag ini sang gobernador sa sunod-sunod nga shooting incidents sa Brgy. Tiwi, Barotac Nuevo; Calinog; Leganes kag Pavia.

Nagakahangawa si Defensor sa nagakatabu bangud ginreport sa Provincial Peace and Order Council meeting sang damlagg lang nga nagnubo ang krimen sa probinsya sang nagligad nga tuig.

Ginpahanumdom naman sang gobernador ang kapulisan nga kinahanglan usisaon ang tanan nga salakyan kon mag-conduct sang checkpoint.

Kasunod ini sang nabaton nga reklamo sang gobernador nga motorsiklo lang ang gina-usisa sa checkpoint samtang ginapabay-an naman ang mga pribado nga salakyan. (JoMaque)