Mga empleyado sang restaurant sa Tabucan, Manduriao, wala gid sang ihibalo kon diin naghalin ang stray bullet nga nagbuslot sang ila atop

Iloilo City–Wala gid sang ideya ang mga empleyado sang Avana Bistro Filipino Restaurant sa Barangay Tabucan, Manduriao kon diin naghalin ang stray bullet nga nagbuslot sa ila atop.

Suno kay Christopher Jaucian nga waiter sa restaurant, natabu ini sang Domingo, Marso 6 sang gab-i. Nakibot na lang ang mga ini sang may naglagpok sa sulod sang restaurant pasado alas-8 sang gab-i.

Nagapasalamat si Jaucian nga wala sang naigo nga customers. Ginpabutyag ni Jaucian nga wala man sila sang nadumduman nga kaaway.

Ginpa-blotter ang natabu sa Manduriao police. Sa pareho man nga gab-i, na-recover ang slug sang 45-caliber pistol sa kalan-an sa likod sang building nga gina-okupar sang Aksyon Radyo Iloilo. (Aine Grace Bravo)