Retired PSINSP Robert Foerster, nagpangalagad na nga bag-o nga TMTRO OIC

Iloilo City–Nag-umpisa na sa pagpangalagad bilang bag-o nga officer-in-charge sang Transportation Management and Traffic Regulation Office ukon TMRO si retired PSINSP Robert “Bob” Foerster kahapon.

Kasunod ini sang ginpatawag nga sinapol ni Mayor Jed Patrick Mabilog sa tuyo nga masolusyonan ang mga problema sa trapiko sa syudad. Ginpasalig ni Foerster nga siya mismo ang makadtu sa media agud mapabalo sa publiko ang pila ka mga impormasyon pareho sang traffic rerouting.

Mangin bukas man suno sa iya ang iya opisina para sa reklamo sang mga transport groups agud nga mahatagan sang madasig nga solusyon ang mga idangup nga problema sa trapiko sa syudad.

Antes pa man ginpili si Foerster bilang OIC sang TMTRO, may mga ginpatuman na siya nga reporma sa departamento sa mga masami nga pag-absent sang mga traffic enforcers.

“Aprub”

Ginkalipay naman sang Iloilo City Loop Alliance of Jeepney Owners and Drivers Association ukon ICLAJODA ang pagpahamtang kay Foerster nga TMTRO OIC. Suno kay ICLAJODA President Boyet Parcon, mas may ikasarang si Foerster sa pag-uyat sang amo nga posisyon bangud sang mga accomplishments sini sadtu bilang hepe sang Traffic Management and Engineering Unit ukon TMEU. (Aine Grace Bravo)