Iloilo City, ginpa-idalum sa State of Water Calamity,

Iloilo City–Gindeklarar ang state of water calamity sa syudad matapos gin-aprubahan sang City Council ang resolution nga gin-author ni Councilor Julie Grace Baronda sa regular session kahapon.

Base ini sa board resolution sang City Disaster Risk Reduction and Management Council nga gin-endorso ni Mayor Jed Patrick Mabilog sa diin pito ka mga barangay ang naka-experyensya sang water shortage bangud sa epekto sang El Niño phenomenon. Ginbasehan man sang resolution ang request sang Liga ng mga Barangay sa City government nga buligan sila sa problema sa kakulang sang tubig.

Ginreport nga ginakulang ang supply sang potable water sa Lanit, Buntatala, Bitoon kag San Isidro sa Jaro kag San Juan, Boulevard kag Calumpang sa Molo.

Ginpahayag ni Councilor Baronda nga santu sa national law ang deklarasyon nga nagasaad nga mahimo makadeklarar sang state of calamity ang local government unit kon duha ka mga barangay ang apektado sang water shortage. Mahimo nga magamit sang syudad ang P3,000,000 para sa water delivery sa mga apektado nga barangay. (Aine Grace Bravo)