Paghabok sang numero sang teenage pregnancy sa probinsya, maka-alarma — Provincial Health Officer 2 Dr. Ma Socorro Quiñon

Iloilo — Maka-alarma ang paghabok sang numero sang teenage pregnancy sa probinsya sang nagligad nga tuig.

Sa record sang Provincial Health Office, may 3 mil 900 ka kaso sang mga teenagers nga nagbusong kag nagbata halin sa 24 sa 43 ka municipalidad.

Nagakabalaka si Provincial Health Officer 2 Dr. Ma. Socorro Quiñon nga magdoble pa ang figure kon mag-abot na ang report halin sa iban nga banwa.

13 anyos ang pinakabata nga narecord nga nagbusong suno kay Quiñon.

Nagahimo na sang paagi si Quiñon agud maka-communicate sa mga teenagers kag mahaylo nga likawan ang pre-marital sex kag sa baylo, magtutok sa pagtuon kag iban pa nga mabungahon nga mga aktibidad.

Ginlaygayan pa sini ang mga kababaihan nga itigana ang virginity sa husto nga lalaki sa husto man nga tiun. (JoMaque)