25-anyos nga babaye, nagreklamo nga ginkuot samtang nagasaut sa club sa Smallville Complex

Iloilo City–Nagreklamo ang 25-anyos nga babaye nga ginhurikap kag ginkuot samtang nagasaut sa MO2 Ice sa Smallville Complex, Manduriao kaina sang kaagahon.

Nagpa-blotter sa Manduriao PNP si alyas Inday sang Roxas City. Gintudlo ni Inday ang 19-anyos nga engineering student nga taga-Estancia nga amo ang nagkuot sa pribado nga parte sang iya lawas.

Suno kay Inday, nagasaut siya sang ginhurikap una sang suspek ang iya miniskirt tubtob nga ginkuot ini. Kaupod man sang dalaga ang iya nobyo kag mga barkada sang natabu ang insidente.

Ginrelease na sang Manduriao police ang suspek matapos nag-aregluhanay sang babaye pero ginpanginwala ang akusasyon kontra sa iya. Ginpahayag nga gintampa pa ang suspek sang himata sang babaye antes siya ginpaguwa sa police station. (Aine Grace Bravo)