42-anyos nga lalaki, patay matapos gintiro sa lodging house sa Balasan

Balasan — Patay ang 42-anyos nga lalaki matapos gintiro sa lodging house sa Barangay Balanti-an, Balasan kaina sang kaagahon.

Ginkilala ang biktima kay Rio Casipit alyas Toto Pagong sang Brgy. Cayos, Pilar, Capiz.

Ginpahayag nga may nagpanoktok sa room number 3 sang lodging house kag ginbuksan sang guest relation officer nga si alyas Inday nga upod sang biktima.

Nagpamangkot pa ang suspek kon diin si alyas Toto Pagong kag sang gintudlo nga nagahigda sa katre, ini ang gintiro sa likod nga naglapos sa dughan.

Narecover sa lugar ang magazine sang 45 caliber pistol samtang ginpahayag nga si alyas Toto Pagong ang nagabaligya sang illegal drugs kag nalakip sa watchlist sang Pilar Police Station. (JoMaque)